విశాఖ, విజయవాడ మెట్రోలకు అనుమతులివ్వండి.. కేంద్రానికి మంత్రి నారాయణ విజ్ఞప్తి

ఆంధ్రప్రదేశ్‌లోని కీలక నగరాలైన విశాఖపట్నం, విజయవాడలో మెట్రో రైలు ప్రాజెక్టుల అనుమతుల ప్రక్రియను వేగవంతం చేయాలని రాష్ట్ర ప్రభుత్వం కేంద్రాన్ని కోరింది. ఈ మేరకు రాష్ట్ర పురపాలక శాఖ మంత్రి పొంగూరు నారాయణ నిన్న ఢిల్లీలో కేంద్ర గృహ, పట్టణ వ్యవహారాల శాఖ మంత్రి మనోహర్ లాల్ ఖట్టర్‌తో సమావేశమయ్యారు. ఈ రెండు ప్రాజెక్టులకు త్వరితగతిన ఆమోదం తెలిపి, పనులు త్వరగా ప్రారంభమయ్యేలా చూడాలని విజ్ఞప్తి చేశారు.

స్వచ్ఛ భారత్ 2.0 అమలుపై ఢిల్లీలో నిర్వహించిన జాతీయ సదస్సులో పాల్గొనేందుకు వెళ్లిన మంత్రి నారాయణ, ఈ సందర్భంగా కేంద్రమంత్రితో ప్రత్యేకంగా భేటీ అయ్యారు. రైల్ ఇండియా టెక్నికల్ అండ్ ఎకనామిక్ సర్వీస్ (రైట్స్) సమర్పించిన నివేదిక ఆధారంగా విశాఖ, విజయవాడ మెట్రోలకు అనుమతులు మంజూరు చేయాలని కోరారు. చాలాకాలంగా పెండింగ్‌లో ఉన్న ఈ ప్రాజెక్టులు పట్టణ ప్రగతికి ఎంతో కీలకమని ఆయన వివరించారు.

ఈ సదస్సులో భాగంగా, ఆంధ్రప్రదేశ్‌లో ఘన, ద్రవ వ్యర్థాల నిర్వహణకు ప్రభుత్వం తీసుకుంటున్న చర్యలను నారాయణ వివరించారు. వ్యర్థాల నుంచి విద్యుత్ ఉత్పత్తి చేసే ప్లాంట్లను ఏర్పాటు చేయడం ద్వారా రాష్ట్రాన్ని "డంపింగ్ యార్డ్ రహిత" రాష్ట్రంగా మార్చడమే తమ ప్రభుత్వ లక్ష్యమని ఆయన స్పష్టం చేశారు. ఇంటింటి నుంచి చెత్త సేకరణ, తడి-పొడి చెత్త విభజన వంటి కార్యక్రమాలను సమర్థంగా అమలు చేస్తున్నట్లు తెలిపారు.